आरसी टाइम्स व्यरो
पोखरा, मंसिर १९
पोखराको कृषि पकेटक्षेत्रका रुपमा पहिचान बनाएको अर्मलाको ठुलीबेसी फाँटमा उन्नत जातका आलुको बीउ उत्पादनका लागि महिला समूहहरु पनि सक्रियता पूर्वक लाग्न थालेका छन् ।
पोखरा महानगरको कृषि विकास महाशाखाले पचास प्रतिशत अनुदानमा विउ आलु उपलब्ध गराएको र कारीतास नेपालले कृषि प्रविधि र औजार उपलब्ध गराएको स्थानीय अगुवा कृषक जीत बहादुर बस्नेतले जनाएका छन् । पोखराको १६ नं वडाको ठुलीबेसी फाँटमा जेठोबुढो धानको पनि विउ उत्पादन हुँदै आएकोमा यसपाली देखि महिला कृषक समुहको सक्रियतामा उन्नत आलुको विउ पनि उत्पादन थालिएको बस्नेतले जनाएका छन् ।
स्थानीय उज्वल भविष्य कृषक समूहका २७ जना र महेन्द्रगुफा कृषक समुहका समुहका ३२ जना समेत गरि ५९ जना महिलाहरुले सामूहिक विउ आलु उत्पादनमा महानगरसँग साझेदारी गरेका छन् ।
महिलाहरुको सहभागितामा बनेको कृषक समुहले उत्पादन गरेको आलुलाई महानगर कृषि महाशाखाले तोकिएको बजार मुल्यमा खरिद गर्ने सुनिश्चीतता पनि प्रदान गरेकाले महिलाहरु खेतिमा उत्साहित बनेका छन् । हालैको प्रयासमा २ समूहले ७०० किलो दरमा १४सय किलो आलु विउ रोपेका छन् ।
महानगरले यो वर्ष आलु अभियानमा ६५ रोपनि जमिनमा आलु रोप्ने र प्रति रोपनी १ हजार किलो आलु फलाउने लक्ष लिएको महानगर कृषि महाशाखा प्रमुख मनहर कडरीयाले जनाएका छन् । पोखरामा यो अभियानले चालु वर्षमा ६५ टन विउ आलु उत्पादनको सफलता पाएमा स्थानीय किसानहरुमा सुधारिएका आलुका बीउहरुको खेति विस्तारमा सहयोग पुग्ने अपेक्षा गरिएको छ ।
