पोखरा, फागुन १,
कास्कीको अन्नपुर्ण गाउँपालिकाका कृषि सहकारीहरुको सक्रियतामा प्राङ्गारिक उन्मुख खाद्य चेतना सहजीकरणका लागि खाद्यमेला र कृषि प्रदर्शनी गरेका छन् । गत शनिबार अन्नपूर्ण गाउँपालिका परिसर ढिकुर पोखरीमा भएको समारोहमा लेवाडे अर्गानकि कृषि सहकारी र फल्लापानकिो सृजनशिल कृषि सहकारीका सदस्य परिवारहरुको सक्रियतामा गरिएको कृषि प्रदर्शनी तथा खाद्य परिकार मेलामा गाउँ पालिका र चिल्ड्रेन नेपालका प्रतिनिधिहरुले पनि सम्बोधन गरे । पालिका अध्यक्ष विष्णु बहादुर केसीले गाउँको समृद्धिका लागि कृषि उद्यम नै प्राथमिकतामा रहेको र पालिकाले अर्गानिक उन्मुख कृषि उद्यमलाई सक्दो सहयोग गर्ने प्रतिवद्दता जनाए ।
कृषिका माध्यमबाट दिगो विकासका लागि महिला र सिमान्तकृत समुदायमा समृद्धिको पहल गर्ने परियोजनाको सक्रियतामा स्थानीय कृषि सहकारी संस्थाहरुको सक्रियतामा खाद्य मेला आयोजना गरेर रैथाने कृषि उपजमा खाद्य पोषण र बजार पहुँचको चेतना विस्तारका लागि सहजिकरणको पहल गरिएको चिल्ड्रेन नेपालका प्रतिनिधिहरुले जनाएका छन् । डिव डेनमार्कको सहयोगमा परियोजना सञ्चालन गर्दै आएको चिल्ड्रेन नेपालले समुदायमा लोपोन्मुख खाद्य परिकार र कृषि उपजको दिगो उपयोगका जुक्तिहरु प्रदर्शनी गरेको परियोजना सहायक दुमनाथ चापागाइले जनाएका छन् ।
विद्यालयका बालवालिकाहरुमा वाल शिक्षा र वाल अधिकारका क्षेत्रमा काम गर्दै आएको चिल्ड्रेन नेपाल नामको गैरसरकारी संस्थाले वालबालिकाहरुको स्वास्थ्यका लागि स्वस्थकर भोजनको अभियान संचालन गर्ने क्रममा अभिभावक किसानहरुलाई स्वस्थकर कृषि उत्पादनमा सहजिकरण गर्ने हेतुले कास्की र तनहुँका ग्रामीण वस्तीमा नमुना प्राङ्गारिक खेति अभियान थालनी गरेको जनाएको छ । कास्कीको अन्नपुर्ण गाउँपालिकाको फल्लापानी र लेवाडे तथा तनहुँको म्याग्दे गाउँमा अर्गानिक कृषि समूह र सहकारी मार्फत यो अभियान संचालन गरेको चिल्ड्रेन नेपालका प्रतिनिधिहरुले जनाएका छन् ।
विद्यालयको अभिलेख अनुसार बालवालिकाको खाजामा पत्रु भोजनको मात्रा बढन थालेकाले बाल स्वास्थ्यबारे चेतना जगाउन प्राङ्गारिक कृषिका माध्यमबाट बालवालिकाहरुको स्वास्थ्य र अभिभावकहरुको आर्थिक हैसीयत सुधार गर्न प्रयोगात्मक अनुसन्धानका लागि तीनवटा समुदायमा प्राङ्गारिक कृषि अभियान संचालन गरिएको चिल्ड्रेन नेपालको कृषि परियोजनामा कार्यरत कृषि प्राविधिक सरस्वती कुँवर कठायतले जनाएकी छन् ।
यसका लागि अन्नपुर्णको फल्लापानीका ६८ र लेवाडेका ४३ तथा म्याग्दे तनहुँका ६३ घरधुरीलाई समेटेर प्राङ्गारिक उन्मुख कृषि उत्पादन गरि स्वस्थकर कृषि उपजको पहुँच बढाउने, वालबालिकालाई स्वस्थकर तरकारी तथा खाद्यन्नको सहजता बढाउने र विपन्न परिवारका लागि कृषिका माध्यमबाट पारिवारिक समृद्धिमा योगदान पुयाउने ध्येय राखिएको प्राविधिक सरस्वतीले जनाएकी छन् ।
अर्गानिक खाद्य मेलाले रैथाने कृषिका विज र परिकार संरक्षणमा नागरिक चेतना बढाउन र नयाँ पुस्तामा विस्तार गर्न योगदान गरेको तथा आगामी दिनमा बनमा पाइने वैकल्पीक खाद्य वस्तुहरुको पनि परिकार संकलन र प्रशोधनका लागि प्रेरणा गरिने अन्नपूर्णका कृषि प्राविधिक मनोज कठायतले जनाएका छन् ।
