आरसी टाइम्स व्युरो
पोखरा, भाद्र २
राष्ट्रिय कृषि आधुनिकीकरण कार्यक्रम, कार्यक्रम कार्यान्वयन एकाइ कास्कीले चालु आर्थिक वर्ष २०८२÷८३ का लागि वार्षिक स्वीकृत कार्यक्रमहरू सार्वजनिक गरेको छ। कास्की जिल्ला समन्वय समिति प्रमुख लिलाधर पौडेलको अध्यक्षतामा सम्पन्न भएको सार्वजनिकीकरण कार्यक्रममा प्रमुख जिल्ला अधिकारी रुद्रादेवि शर्मा, जिल्ला समन्वय अधिकारी नवराज बराल र कास्कीका स्थानीय पालिकाका प्रतिनिधिहरुको सहभागीता रहेको थियो ।
कार्यक्रममा परियोजना कार्यान्वयन एकाइ कास्कीका प्रमुख माधव लम्सालले चालु आर्थिक वर्षको कार्यक्रमको रुपरेखा प्रस्तुत गर्दै विगतका अनुभव र सिकाइहरूको समीक्षा गरिएको बताए। उनका अनुसार यसअन्तर्गत कृषि समूह, सहकारी, उद्यमी, किसान समिति र कम्पनीहरूलाई लक्षित विविध परियोजनाहरू समावेश गरिएको छ, जसले जिल्लाको कृषि क्षेत्रमा समग्र प्रगति र आधुनिकीकरणमा टेवा पुर्याउने अपेक्षा राखिएको छ।
लम्सालले विगतको दश वर्षे परियोजनाको अन्तिम वर्षमा यस कार्यक्रमको नाम परिवर्तन भइसकेको र आगामी पाँच वर्षका लागि यसको नवीकरण हुने सम्भावना रहेको स्पष्ट पारे। सहभागीहरूले कार्यक्रमको प्रभावकारिता, आगामी योजनाहरू र किसानलाई अझ सशक्त बनाउनुपर्ने पक्षबारे छलफल गरेका थिए ।
कृषि आधुनिकीकरण कार्यक्रमले चालु आ.व. २०८२÷८३ को वार्षिक स्वीकृत कार्यक्रम बमोजिम तपसिलका कार्यक्रमहरु सहभागी हुन यहि भाद्र १९ गते भित्र तोकिएको ढाँचा अनुसार सुचिकृत भइ आवेदन दर्ता आव्हान पनि गरेको छ ।
कास्की जिल्लामा राष्ट्रिय कृषि आधुनिकीकरण कार्यक्रम अन्तर्गत ३१ कार्यक्रमहरू प्रस्ताव गरिएका छन् । सिंचाइ पूर्वाधारदेखि उच्च प्रविधि प्रयोग गरी च्याउ उत्पादनसम्मका आयोजना समावेश छन् । मुख्य कार्यक्रमहरूमा सिंचाइ र पूर्वाधार आयोजना, कृषि उपज प्रशोधन र बजारिकरण, चक्लाबन्दी कार्यक्रम, असिना जाली वितरण, नर्सरी स्रोत केन्द्र सुदृढीकरण, कृषि यान्त्रिकरण , तरकारी बीउ उत्पादन, हाईटेक संरचना र टनेल , अलैची जोन विस्तार, गाई–भैसी प्रवद्र्धन ,चैते धान विशेष कार्यक्रम, सामुदायिक नर्सरी र राइस ट्रान्सप्लान्टर प्रयोग, च्याउ उत्पादनका कार्यक्रमहरुमा सहकार्य गर्न किसानहरुलाई आव्हान गरेको छ ।
कास्कीका कृषकहरूले यी कार्यक्रमहरूबाट आधुनिक प्रविधि, उत्पादनशक्ति वृद्धि, बजार पहुँच र आय वृद्धिमा लाभ लिने अपेक्षा गरिएको छ ।
