आरसी टाइम्स व्युरो
पोखरा, भाद्र ९
गण्डकी प्रदेशका कृषि ज्ञान र पशु विज्ञ केन्द्रका योजना सार्वजनिक भएका छन् । प्रादेशिक निर्देशनालय खारेजीका कारण केही समयदेखि अन्यौल देखिएको गण्डकी प्रदेशको कृषि तथा पशु सेवा क्षेत्रले चालु आर्थिक वर्ष २०८२/८३ का लागि आफ्ना योजना र कार्यक्रमहरू सार्वजनिक गर्न थालेका छन् ।
हालै पोखराको माटेपानीस्थित भेटेरीनरी अस्पताल तथा पशु सेवा विज्ञ केन्द्रमा आयोजना गरिएको कार्यक्रममा गण्डकी प्रदेशकी कृषि मन्त्री पद्मा जीसीको उपस्थितिमा कास्कीका कृषि ज्ञान केन्द्र र भेटेरीनरी अस्पताल–पशु सेवा विज्ञ केन्द्रले संयुक्त रुपमा वार्षिक कार्यक्रम सार्वजनिक गरेका हुन् ।
कार्यक्रममा कृषि ज्ञान केन्द्र कास्कीका प्रमुख किरण सिग्देल र भेटेरीनरी अस्पताल तथा विज्ञ केन्द्रका प्रमुख शम्भू पाण्डेले आ–आफ्नो क्षेत्रगत कार्यक्रम र विनियोजित बजेटबारे जानकारी प्रस्तुत गरे ।
राष्ट्रिय कृषि आधुनिकीकरण कार्यक्रमसँग दोहोरो नहुने गरी बजेट खर्च हुने र उत्सुक किसानहरूले आफ्ना प्रस्तावहरू सेवा केन्द्रमार्फत पठाउन सकिने कुरा किसानमैत्री ढङ्गले बजेट प्रवाह गर्ने सिग्देल र पाण्डेले प्रतिबद्धता व्यक्त गरे । समारोहमा किसानका तर्फबाट शोभाखर भट्टराईले किसानमैत्री योजनाहरू प्राथमिकतामा पर्नुपर्नेमा जोड दिएका थिए ।
समारोहमा सरकार र किसानबीच सहकार्यलाई कृषि विकासको आधार बताउँदै कृषि मन्त्री पद्मा जीसीले मिडियाको खबरदारी सुशासन सुदृढीकरणको आधार भएकाले सरकारलाई खबरदारी र सुझाव दुबै खाँचो रहेको बताइन् ।
किसानलाई नयाँ कार्यक्रमहरुमा प्रस्ताव हाल्न जिल्लासम्म धाउनु पर्ने समस्या न्युनीकरण गर्दै पालिका स्तरबाट प्रस्ताव संकलनको व्यवस्था मिलाउन पनि मन्त्री जिसीले जोड दिएका छ्न् । योजना सार्वजनिकसँगै कास्कीका किसानहरूले प्रदेशीय संरचनामा देखिएको अन्यौलताबाट बाहिर निस्कँदै प्रत्यक्ष लाभ पाउने कार्यक्रमहरुमा सक्रियताको अपेक्षा गरिएको बताइएको छ ।
