गुवो हाल्ने बेलामा जेठोबुढो धानमा ब्लाष्ट रोगको प्रकोप

  रोपेको महिनादिन नपुग्दै पर्वतका विभिन्न क्षेत्रमा लगाईएको जेठोबुढो धानमा ब्लाष्ट रोगको प्रकोप फैलिएको छ । जिल्लाको फलेवास नगरपालिकाका वडा नं. ४ मुडिकुवा, वडा न. ५ खानीगाउँ, वडा नं. ६ देविस्थान लगायतका वडामा व्यावसायिक रुपमा लगाईएको जेठोबुढो धानमा रोग लागेको हो । ब्लाष्ट रोगका कारण  पात सुक्ने, डाँठ तथा जरा सुक्दै जाने  समस्या देखिएको छ । गाँज राख्ने र सप्रिने बेलामा धानवालीमा समस्या देखिएपछि कृषक चिन्तित बनेका छन् । किसानहरुको वालीमा आकस्मिक रुपमा रोग देखिएको फलेवास नगर कृषि अधिकृत केदार सापकोटाले जानकारी दिए । सापकोटाले  धानमा देखीएको समस्या समाधानका लागि नगर पालिका सँगै  राष्ट्रिय कृषि आधुनिकिकरणको टोली समेत लागी परेको  बताए ।

व्यावसायिक रुपमा लगाईएको सयौ रोपनी खेतमा ब्लाष्ट रोगको प्रकोप देखिएपछि राष्ट्रिय कृषि आधुनिकिकरण कार्यक्रम कार्यान्वयन ईकाई बागलुङका प्राविधिक सहितको टोलीले स्थलगत रुपमा अनुसन्धान गरेको छ । गत वर्ष गुबो कुहिने र ढुसी किराकोे प्रकोपले क्षति व्यहोरेका कृषकले यस वर्ष पुनः ब्लाष्ट रोगले समस्या पारेको गुनासो गरेका छन् । अहिले फलेवासका तीन वटा वडामा बढि मात्रामा संक्रमण देखिएको भएपनि अन्य वडाहरुमा समेत सामान्य समस्या देखिन थालेको छ ।

स्थलगत रुपमा पुगेको राष्ट्रिय कृषि आधुनिकिकरण कार्यक्रमको प्राविधिक टोलिले राईस ब्लाष्ट, र  ट्राईसीक्लाजोल नामको विषादी सिफारीस गरेका छन् । कार्यालयका प्राविधिक ललित सुनारले धानवालीमा देखिएको समस्याको निदानका लागि दुईवटा विषादी सिफारीस गरिएको बताए । सुनुवारका  अनुसार एक ग्राम विषादी एक ग्राम पानीमा घोलेर छर्किएपछि एक सातामै सुधार आउने छ ।गत वर्षपनि यस्तो रोग लागेको भएपनि सामान्य क्षति भएको थियो ।

स्थानीय कृषक लालबहादुर कुँवरले धानमा गाँज राख्ने र सप्रिने बेलामा रोग लाग्दा उत्पादन घटेर जाने बताए ।