परदेशबाट फर्केर कृषिमा रमाउने शालिकरामको प्रयास

 गोपाल जीटी/आरसी टाइम्स
वालिङ्ग, 
नेपाली युवाहरुका लागि वैदेशिक रोजगारी आकर्षक गन्तव्य बनिरहेको छ । विगतका दिनदेखिकै प्रचलन हो, पैसा कमाउनका लागि विदेश जाने । पछिल्लो समयमा युवा विदेशिने क्रममा अझ वृद्धि आएको देखिन्छ । केहीले उतैको पि आर लिएर बसेका छन् त कोही फर्किएर गाउँ ठाउँमै व्यवसायी बनेका छन् । फर्किएकाहरु कोही सफल व्यवसायी बनेका छन् भने केही व्यवसायी बन्ने प्रयासमा छन् ।
यसैबीच स्याङ्जाको चापाकोटका शालिकराम आचार्य वैदेशिक रोजगारीबाट फर्केर व्यवसायी बन्ने प्रयासमा छन् । चापाकोट ८ छिपछापका आचार्य १७ वर्ष साउदी अरबको बसाईपछि फर्केर पशु तथा कृषि फर्म सञ्चालन गरेर कृषिलाई आधार बनाउने प्रयासमा छन् । आचार्यले २०७७ सालदेखि शुभारम्भ बहुवृद्धि कषि तथा पशु फर्म सञ्चालन गर्दै आएका छन्  । ४ वटा भैंसीबाट सुरु गरेका आचार्यको फर्ममा अहिले ५ वटा भैंसी र ५ वटा गाई गरी १० वटा छन्  । तिनै गाई भैंसीको रेखदेखसहित बिहानको समय बजारमा दूध लैजानु आचार्यको दैनिकी बनेको छ ।
४० देखि ५० लिटर दूध दैनिक विक्रि गर्दा खर्च कटाएर मासिक ४० हजार बचत हुने आचार्य बताउँछन्  । विदेशमा काम गर्दा मासिक कमाई जे जस्तो भएपनि दवावमा रहनुपर्छ, स्वतन्त्रता हुदैन  । यहाँ आफ्नो खुसीले गर्न सकिन्छ, मेहनत अनुसार आम्दानी पनि लिन सकिनेमा विश्वास लिएको छु  । त्यसैले कृषि कर्ममा लागेको हुँ, कमाई पनि राम्रै छ, आचार्यले भने लगानीको आधारमा आम्दानी राम्रै छ, घर खर्चसहित जीविकोपार्जन सजिलै चलेको छ  । ठूलो लगानीमा गर्ने हो भने कमाई पनि सोहि अनुसार लिन सकिने आफ्नो तीन वर्षे अनुभवले देखाएको आचार्य सुनाउँछन् ।
साढे दुई लिटरको पेय पदार्थलाई ३ सयमा किन्न धेरैजना तयार हुन्छन् जुन स्वस्थकर हुँदैन  । त्यो भन्दा सस्तो र स्वास्थ्यका हिसावले पनि फाइदै फाइदा गर्छ र पनि मानिसहरुले दुध किनेर खान हिच्किचाउछन्  । योसँगै बढ्दो आधुनिकताले निम्त्याएको विकृतिमा मानिसहरु आकर्षित हुने गरेको उनको भनाई छ ।
दुध उत्पादनमा भैसी पनि ठिकै छ तर गाईबाट छिटो र राम्रो आम्दानी लिन सकिने आचार्यको अनुभव भैसकेको छ  । दुध उत्पादनमा तुलनात्मकरुपमा भैंसीबाट भन्दा गाईबाट बढि फाइदा लिन सकिदो रहेछ उनले भने—एउटा गाईले व्याएको ४ महिनामा आफ्नो खर्च उठाउँछ भने त्यसपछि फाइदै फाइदा हुन्छ ।मेहेनती आचार्यले छोरालाई विदेश जानबाट भने रोक्न सकेनन्  । आचार्यका दुई छोरीको विवाहदान भैसकेको छ र छोरा कुवेत गएका छन्  । पहिला आँफूलाई घरको व्यवसायमा सहयोग गर्दै आएका छोराले वैदेशिक रोजगारीको पनि अनुभव गर्ने रहरमा कुवेत गएका आचार्य बताउछन्  । विदेशमा कत्तिको परिश्रम गर्नुपर्छ भन्ने अनुभव लिएपछि फर्केर छोराले यहीं मेहेनत गर्नलाग्नेमा उनी विश्वस्त छन् ।