लक्ष्मण बिसि,पर्वत ,
पर्वतका ७ वटै पालिकामा पिउने पानीका अधिकांश मुहानमा दिसामा पाइने किटाणु (कोलिफर्म) भेटिएको छ । गत फागुन र चैत महिनामा जिल्लाभरका पालिकामा गरिएको पानीको नमुना परिक्षणमा मानव स्वास्थ्यलाई हानी गर्ने कोलिफर्म उच्च मात्रामा भेटिएको हो । हालै पर्वतको कुश्मामा आयोजित सरोकारवालासँग खानेपानीको गुणस्तर सम्बन्धि अन्तरक्रिया कार्यक्रममा बोल्दै स्वस्थ्य कार्यालय पर्वतका निमित्त प्रमुख सन्तोष पौडेलले खानेपानीको अवस्थाबारे जानकारी दिदै जिल्लाका अधिकांश बासिन्दाले दुषित पानी पिउने गरेको बताए ।
स्वास्थ्य कार्यालय पर्वतका ल्याव टेक्निसियन मुना सापकोटाका अनुसार कुश्मा नगरपालिका भित्रका ३१ ठाउँमा जलस्रोतमा परिक्षण गर्दा ८० प्रतिशत, फलेवास नगरपालिका भित्र १४ ठाउँ गर्दा ७८ प्रतिशत,मोदी गाउँपालिकामा १५ ठाउँमा परिक्षण गर्दा ६६ प्रतिशत,महाशिलाका १३ ठाउँमा परिक्षण गर्दा ६१ प्रतिशत,पैयुँका १४ ठाउँको परिक्षण गर्दा ५७ प्रतिशत र बिहादीका १२ ठाउँमा परिक्षण गर्दा ७५ प्रतिशतमा कोलिफर्म फेला परेको छ । कोलिफर्मको कारण झाडापखाला, हैजा, भाइरल ज्वरो र रूघाखोकी लगायत महामारीजन्य रोगको संक्रमण हुने खतरा बढेको उनले बताइन् । पर्वत अस्पतालका मेडिकल अधिकृत सुरज नेपालीले दुषित खानेपानीका कारण धेरै रोग लाग्ने भएकाले पानी शुद्धिकरण गरेर पिउनुपर्ने बताएका छन् । बार्खायाममा अझ बढी किटाणु भेटिने हुँदा पानी फिल्टर गरेर अथवा उमालेर मात्र पिउन आग्रह गरेका छन् ।
कार्यक्रममा बोल्दै जिल्ला समन्वय समिति पर्वतका प्रमुख विष्णुराम वि.कले जनप्रतिनिधि भौतिक संरचना निर्माणमा होडबाजी गरेको तर जनताका आधारभुत आवश्यकतामा ख्याल नपु¥याएको बताए । बिकले खानेपानीबाट नै मानिसमा धेरै रोग लाग्ने भएकाले स्थानीय सरकारले गाउँगाउँमा खानेपानी शुद्धिकरण सम्बन्धी संचेतना कार्यक्रम संचालन गर्न जरुरी रहेको बताए । जिल्ला बासीलाई शुद्ध पानी खुवाउन पर्वतका सातै स्थानिय तह र सरोकारवाला निकायसँग समन्वयात्मक भुमिका खेल्ने प्रतिबद्धाता व्यक्त गरे ।
