आरसी टाइम्स व्युरो
पोखरा, भाद्र ९
महानगरले न्यूनतम समर्थन मूल्य तोक्दै किसानलाई प्रोत्साहन गर्न थालेपछि पोखराका किसानहरुले वर्षका दुई सिजनमै तरबुजा उत्पादन सम्भावना देखाएका छन् । पोखरा महानगरको वडा २२ पुम्दी भूम्दीका किसानहरूले प्लास्टिक घर प्रयोग गरेर वर्षे सिजनाको तरबुजा उत्पादन सुरु गरेका छन् ।
पर्यटकीय शहर पोखराको होटलहरुमा भारतीय उत्पादनको भरमा वेमौसमी मुल्यमा बजारिकरण भइरहेको अवसरमा रैथाने प्रकृयामा वर्षाकालमा पनि तरबुजा उत्पादन सम्भावनाको प्राविधिक परीक्षण गर्दा परिणाम उत्साहजनक रहेको महानगर कृषि शाखाले जनाएको छ । आर्थिक वर्ष २०८२/०८३ का लागि महानगरपालिकाले तरबुजा सहित हालसम्म ३७ कृषि वस्तुको न्यूनतम समर्थन मूल्य घोषणा गर्दै किसानको उत्पादनमा हौसला दिने र उपजको मूल्यमा न्यूनतम ग्यारेन्टी सुनिश्चित गर्ने पहल गर्दै आएको छ ।
उपजको मूल्यमा न्यूनतम ग्यारेन्टी सुनिश्चित गर्ने पहल बढेसँगै स्थानीय उत्पादन तर्फ लागौं, आम्दानी र रोजगारी बढाऔ भन्ने कृषि आत्मनिर्भरता र बजार व्यवस्थापनमा सकारात्मक हस्तक्षेप बढाउन पहल बढेको पाइएको छ । प्लास्टिक घरमा तरबुजा उत्पादनको नयाँ प्रविधिले पोखरामा मौसमी उत्पादन प्रणालीलाई बदल्दै किसानलाई वर्षमा दुईपटक आम्दानी गर्ने अवसर दिने विश्वास गरिएको छ । स्थानीय बजारमै उत्पादन खपत हुने र आयात निर्भरता घट्ने अपेक्षा गरिएको छ ।