आरसी टाइम्स व्युरो
मुस्ताङ्ग, भाद्र ९
मुस्ताङजस्तो हिमाली जिल्लामा तरबुजा फलाउने कुरा केही वर्षअघिसम्म कल्पनाभन्दा बाहिर थियो ।
तर, हालै गरिएको प्रयासले त्यस्तो असम्भव जस्तै लाग्ने कुरा सम्भव बनेको कृषि प्राविधिकहरुले जनाएका छन् ।
मार्फाको शितोष्ण बागवानी विकास केन्द्रमा गरिएको परिक्षण उत्पादन अनुसार सफल नतिजा पाइएको वागमानी केन्द्र प्रमुख पद्म नाथ आत्रेयले जनाएका छन् ।
समुन्द्र सतहदेखि २६५० मिटरको उचाइमा रहेको मार्फामा पोखराबाट लगीएको ‘लक्ष्मि ७६७’ जातको तरबुजा लाई तीन प्रकारको मोडलमा परिक्षण गरिएको आत्रेयले जनाएका छन् । मार्फा वागमानीमा खुल्ला, प्लास्टिक घर र सिसाघरमा परिक्षण गरिएकोमा सिसाघरमा गरिएको परिक्षण सफल भएको आत्रेयले जनाएका छन् ।
वागवानीमा यसै वर्ष बैशाखमा लगाएका तरबुजाका बिरुवामा जेष्ठको अन्त्यतिर फूल फुल्न थालेको थियो । भाद्रको पहिलो हप्तादेखि टिप्न थालिएको यो फल स्वाद र आकर्षणका हिसाबले निकै सफल देखिएको प्राविधिकहरुले प्रतिकृया दिएका छन् । तरबुजाको गुदी रातो, आकर्षक, रसिलो र मिठासले भरिएको पाइएको छ ।
परीक्षणमा यसको गुलियोपन १०–११५ नापिएको छ, जुन व्यावसायिक उत्पादनका हिसाबले सन्तोषजनक मानिन्छ । मुस्ताङको चिसो हावापानीमा समेत यसरी तरबुजा फलाउन सकिएको देखिनु कृषकका लागि उत्साहजनक खबर बनेको छ ।
विशेषज्ञहरूले यो अनुभवलाई आधार मानेर भविष्यमा चिसो सहन सक्ने जात आयात गरी थप अध्ययन र अनुसन्धान गर्नुपर्ने सुझाव दिएका छन् । यस प्रयोगात्मक खेतीले मुस्ताङमा तरबुजाको व्यावसायिक सम्भावना देखाएको छ । अब व्यवस्थित अनुसन्धान र प्राविधिक सहयोग पाउन सके, मुस्ताङका कृषकहरूले गर्मीयाममा तरबुजा खेतीलाई पनि आम्दानीको नयाँ विकल्प बनाउन सक्ने अनुमान गरिएको छ ।
