विरामी बंगुरको मासु विक्री गर्नेलाई नगरपालिकाकोे कार्वाही

आरसी टाइम्स व्युरो
पर्वत, चैत्र १३
जिल्लाको कुस्मा बजारका एक बङगुर ब्यवसायीले बिरामी परेको बङ्गुर काटेर कुस्माका मासु पसलमा बिक्री गरेको भेटिएका छन्  । वडा न. ५ बस्ने लुक पुन मगरले ब्यक्तिगत रुपमा आफ्नो गोठमा पाल्दै आएको बंङ्गुर काटेर मासु पसलमा बिक्रीका लागि पुर्याएका हुन्  । बंङ्गुर यहि चैत ७ गतेदेखि बिरामी भएको बंगुरको उपचार नगरी बिरामी बङगुरकाटि विक्री वितरण गरेको पत्ता लागेको जनाइएको छ  ।
यसरी विरामी बंगुर काटेर विक्रि गरिएको सुचना नगरपालिकाको पशु सेवा शाखामा फोन मार्फत उजुरि परेको हुँदा गत शुक्रबार छानबिन गर्ने क्रममा सो कुरा जानकारीमा आएकोे नगरपालिकाका पशुसेवा शाखा प्रमुख रुपक कडेलले जानकारी दिए  ।
देशका विभिन्न ठांउमा पछिल्लो समय अफ्रिकन स्वाइन फिवर नामक सरुवा रोगको संक्रमण फैलिरहेका बेला विरामी भएको बंगुरको मासु मानव स्वास्थ्यका लागि हानिकारक रहेको हुनाले उक्त मासु जफत गरि नष्ट गरिएको कडेलले जनाए  ।
बगुंर पालक मगरलाई आगामी दिनमा मानव स्वास्थ्य माथी खेलवाड नगर्न नगरपालिकाले चेतावनी समेत दिएको छ  । छानबिन पश्चात् पसलमा बिक्रीका लागि राखिएको मासुलाई कुश्मा नगरपालिकाका निमित्त प्रमुख प्रशासकीय अधिकृत विष्णु प्रसाद तिवारी, कुश्मा नगरपालिका पशु सेवा शाखाका शाखा प्रमुख डा. रुपक कंडेल, पशु सेवा शाखाका अधिकृत राजेन्द्र सुवेदी, कुश्मा नगरपालिकाका अधिकृत यम प्रसाद शर्मा पौडेल, नायब पशु सेवा प्राविधिक दिपक गुरुङ, जिल्ला प्रशासन कार्यलय पर्वतको प्रतिनिधि, जिल्ला प्रहरी कार्यालय पर्वतका प्रहरी हवल्दार गणेशप्रसाद पोख्रेल, भेटेरीनरी अस्पताल तथा पशु सेवा विज्ञ केन्द्र पर्वतका सुचना अधिकारी सुभाष रेग्मी र स्थानीय जनप्रतिनिधिको उपस्थितिमा मासुको स्थलगत निरिक्षण गरि गुणस्तरहिन मासुलाई नस्ट गरिएको छ । विरामी पशुको मासु लगेर राखिएको फ्रीजमा रहेको अन्य मासु पनि बरामद गरी कुल ६० केजी मासु नष्ट गरिएको जनाइएको छ ।