परदेशबाट फर्केका फालचन्द्र नमुना कृषि उद्यमी बन्दै

गोपाल जीटी
वालिङ्ग,
वैदेशिक रोजगारी युवाहरुको आकर्षक गन्तव्यकारुपमा लिइरहेको अवस्थामा स्याङ्जा वालिङका फालचन्द्र कोइराला पनि दुवई पुगे  ।सत्रवर्ष दुवईमा काम गरेर फर्केका वालिङ ८ का फालचन्द्र र श्रीमती कल्पना विगत ४ वर्षदेखि कृषि उद्यममा व्यस्त छन्  ।कुनैपनि कामबाट सफल हुनको लागि निरन्तरता र लगनशीलता आवश्यक पर्दछ  ।उनको मेहेनत र समय अनुसारका उत्पादनले एक सफल कृषि उद्यमी बन्दै गरेको आभास गराएको छ  ।
आफ्नै घर भीमटारीमा उनले कोइराला कृषि तथा पशुपंक्षी फर्म सञ्चालन गर्दै आएका छन्  । आफ्नो १ रोपनी र अरुको ४ गरी ५ रोपनी जग्गामा उनले तरकारी फलाएका छन्  ।उनले अरुको ४ रोपनी जग्गा रु. ५० हजारमा बन्धकी लिएका हुन्  ।अहिले उनको फर्ममा गोलभेडा र काँक्रा लटरम्म फलेका छन् भने १ हजारको हाराहारीमा ब्रोइलर कुखुरा पनि छन्  ।सिद्धार्थ राजमार्गसँगै रहेको वालिङको मुख्य बजारदेखि दक्षिणतर्फ डेढ किलोमिटर भित्रि सडक छेउमै कोइरालाको फर्म रहेको छ  ।
जहिले पनि फालचन्द्रको कोइराला कृषि तथा पशुपंक्षी फर्म हराभरा देखिन्छ  ।उनले यो रहर लाग्दो कृषि उद्यमबाट भरलाग्दो आम्दानी लिइरहेका छन्  ।करिव ३ रोपनीमा लगाएको १२ सय बोटमा गोलभेडा लटरम्म फलेका छन्  ।बिरुवा लगाएदेखि लामो खडेरी परेपनि थोपा सिंचाईको प्रयोग गर्दै आएको हुँ, राम्रै फलेको छ, फालचन्द्र बताउँछन्  ।
उनको गोलभेडा अहिले थोकमा प्रति किलो रु. ५० र खुद्रा रु.७० मा बिक्रि भैरहेको छ  ।बजारको समस्या छैन, व्यापारीहरु घरमै आउछन् भने दैनिक ५० किलोको अनुपातमा खुद्रा पनि बिक्रि भैरहेको छ  ।यो लटमा खर्च कटाएर १ लाख बचत हुने उनको अनुमान छ  ।
हिउँदे र वर्षे तरकारी तथा कुखुरा पालेर वार्षिक ६ देखि ७ लाखसम्म आम्दानी गर्दै आएको फालचन्द्र बताउँछन्  ।परिश्रम गर्ने हो भने घर परिवारसँगै रहेर खाडी मुलुकमा हुने कमाई सजिलै गर्न सकिने उनको भनाई छ  ।उनी भन्छन्—“म पनि १७ वर्ष दुवईमा काम गरें, फर्केर कृषि कर्म रोजें  ।विदेशमा पनि त्यत्तिकै पैसा पाइँदैन, कडा परिश्रम गर्नुपर्छ  ।त्यत्तिको परिश्रम यहाँ गर्ने हो भने अझ बढि कमाई गर्न सकिन्छ, जुन मेरो अनुभवले देखाएको छ  ।जग्गाको कमि छैन, कमि छ त हाम्रो जाँगर र विश्वास  ।आफ्नो भए ठिक छ, छैन भनेपनि अरुको जग्गा बन्धकी या भाडामा लिएर गरे पनि राम्रो आम्दानी गर्न सकिन्छ  ।त्यसैले विदेश गएका फर्कनुस, जान खोज्नेहरु रोकिनुस्, मेहेनत गर्ने हो भने आफ्नै घर परिवारसँगै कृषि उद्यमी बनेर जिविकोपार्जन गर्न सकिन्छ  ।”
कुन माटो र हावापानीमा के फल्छ, त्यो पहिचान गरेर कृषि पेशामा लाग्ने हो भने अवस्य पनि आम्दानी हुनेगरी उत्पादन गर्न सकिने उनको विश्वास छ  ।