असल कृषि अभ्यासका लागि बाली उपचार शिविर

आरसी टाइम्स व्युरो
तनहुँ, फाल्गुण १२
स्वस्थकर कृषि उत्पादनका लागि एकिकृत र असल कृषि अभ्यासका पहलहरु स्थानीय किसानसम्म पुर्याउन कृषि सहकारी र स्थानीय कृषि सरकारका एकाइहरु सक्रिय देखिएका छन्  । हालै तनहुँको घिरिङ गाउँपालिका वडा नम्बर १ को उर्वरा कृषि सहकारीका सदस्य कृषकहरूको खेतमा बाली उपचार शिविर सञ्चालन भएको छ  । घिरिङ गाउँपालिका तनहुँको आयोजनामा भएको बाली उपचार शिविरमा कृषकहरूले लगाएको खेतबारीमा पुगी बाली परिक्षण र परामर्श सेवा प्रदान गरिएको जनाइएको छ  । प्राविधिकहरुले खेतबारीमा बालीको समस्याहरूको पहिचान गरी उपचार पद्धति र रोग किरा अनुसारको विषादी तथा सुक्ष्म तत्व फेरोबिन ट्रयाप लगायतका कृषि उपचार वस्तुहरू कृषकहरूलाई उपलब्ध गराएका छन्  । कृषकहरूले तरकारी, खाद्यबाली, फलफुलमा देखिएका रोग किरा, फल खस्ने, फल कुहिन,े चिरिन,े फुल नफुल्ने जस्ता समस्याहरूको बारेमा सोधपुछ गरेका छन्  । विज्ञहरुले किसानलाई सैद्धान्तिक ज्ञान दिएका छन्  । शिविरमा कृषि विकास शाखा घिरिङका प्रमुख रवि रामदाम, कृषि प्राविधिकहरू समीक्षा ढकाल, सामना नेपाली, वर्षा थापाले सहजीकरण गरे  ।
उर्वरा कृषि सहकारी संस्थाका अध्यक्ष केशवराज पोख्रेलको अध्यक्षतामा भएको कार्यक्रममा घिरिङ गाउँपालिकाका प्रमुख प्रशासकीय अधिकृत कृष्णप्रसाद ढकालले सम्बोधन गर्दै कृषकहरूलाई अन्नदाताको रुपमा सम्मान गर्नु पर्ने बताउँदै राष्ट्रलाई जस्तोसुकै संकटमा पनि भोकमरीबाट बचाउने कृषक नै भएकाले किसानको बाली सुरक्षित राख्न सके मात्र उत्पादकत्व बढाउन सकिने बताए  । उत्पादनलाई सुरक्षित भण्डारण गर्न पनि उत्तिकै महत्वको विषय रहेको ढकालले बताए  । कार्यक्रममा संस्थाका सचिव रामप्रसाद श्रेष्ठ र सदस्य लक्ष्मी बस्ताकोटीले किसानहरुका समस्याहरू राख्दै र पालिकाका कृषि मुलक क्रियाकलापहरुको समीक्षा मन्तव्य राखेका थिए ।