आरसी टाइम्स व्युरो
मनाङ्ग, बैशाख १८
भेटेरिनरी अस्पताल तथा पशु सेवा विज्ञ केन्द्र मनाङले पशु प्रजनन केन्द्र पोखराको सहकार्यमा हालै सम्पन्न गरेको पशु प्रजनन श्वास्थ्य शिविरमा तीन पालिकाका ६१ घरपरिवारका घरगोठमा स्थलगत सेवा टेवा दिएको जनाएको छ ।
हालैको हप्तामा विज्ञ सेवा सहितको पशु स्वास्थ्य तथा वांझोपन निवारण शिविर बाट मनाङ्गका नासों, चामे, र मनाङ ङिस्याङ गाउपालिकाका किसानहरुले लाभ लिएको मनाङ्ग भेटेरीनरी कार्यालय प्रमुख नारायण कुसुमले जनाएका छन् ।
जिल्ला भेटेरिनरी अस्पतालको आयोजना र राष्ट्रिय पशु प्रजनन कार्यालय पोखराको प्राविधिक सहयोग तथा स्थानीय तहहरुको समन्वयमा शिविर सन्चालन भएको भेटेरीनरी कार्यालय प्रमुख कुसुमले जनाएका छन् ।
शिविरका लागि आयोजित समारोहमा नासों गाउपालिकाका उपाध्यक्ष वेदवहादुर गुरुङ, मनाङ जिल्ला समन्वय प्रमुख चिन घले र राष्ट्रिय पशु प्रजनन कार्यालय पोखराका प्रमुख जगदिश पाण्डेयले सम्बोधन गरेका थिए ।
सम्बोधनका क्रममा असल र अर्थपूर्ण पशुपालनमा पांच खम्वे नीति जस्तो पशु आहारा, पशु प्रजनन, पशु स्वास्थ्य, पशु ब्यवस्थापन र उत्पादित वस्तुको यथेस्ट बजारलाई विशेष मध्यनजर राखिनु पर्ने राष्ट्रिय पशु प्रजनन कार्यालय पोखराका प्रमुख पाण्डेयले बताए ।
आज भन्दा ५० वर्ष अघि नेपालमा २ लाखको हाराहारीमा याक चौंरीपालन भएकोमा अहिले आएर यसको संख्या निराशाजनक तरिकाले घटिरहेकोले हिमाली भेगमा याकचौंरी, भ्याङलुङ भेडापालनलाई राज्यका तर्फवाट विशेषखालको सहजीकरण हुनु पर्ने नासो गाउपालिकाका उपाध्यक्ष वेद वहादुर गुरुङले जोड दिए ।
मनाङ जस्तो दुर्गम हिमाली जिल्लामा विशेषज्ञ सेवा सहितको पशु स्वास्थ्य तथा वांझोपन निवारण शिविर स्थलगत रुपमा घर घरमा गएर सेवा टेवा दिएकोमा जिल्ला समन्वय प्रमुख चीन घलेले विशेष धन्यवाद दिएका छन् ।
तीन दिवसीय शिविरमा नासोको ताचै, तिल्चे ओडार र दानाक्यूमा घरदैलोमा पुगि १२ गाइहरुको वांझोपन संवन्धी विशेषज्ञ पशुचिकित्सकहरुद्वारा परिक्षण गरि उपचार गरिएको जनाइएको छ ।
किसानहरुलाई निकट भविष्यमा आफना पशुधन कुन कुन समय तालिकामा कसरी उपचार गर्ने भन्नेवारेमा पनि
परामर्श दिइएको थियो ।
बाह्र गाइहरुको परीक्षण गर्दा फ्लासिड पाठेघर, परसिस्टेण्ट कर्पस लिउटियम वाहेक कुनै पनि पाठेघर संवन्धी संक्रमण नभएको र सवै गाइहरुमा सन्तुलित आहाराको कमिको कारण पशु समयमा वाली जान नसकेको पशुस्वास्थ्य विज्ञ खगेन्द्र सापकोटाले जनाएका छन् ।
तेसै गरि चामे गाउँपालिकामा ५ वटा गाइहरुको परिक्षण गरिएकोमा कुनै पनि पाठेघर संवन्धी संक्रमण नभएको र सन्तुलित पशु आहाराको कमीले पशु समयमा सांढे नखोज्ने समस्या भएको पाइएको छ ।
मनाङ ङिस्याङ गाउपालिकामा पशु प्रजनन संवन्धी उपचारको लागि कृषकहरुको माग अनुसार लुलु गाइ र चौंरीहरुमा प्रजनन सुधारको लागि औषधि वितरण गरिएको छ ।
तीनवटै गाउपालिकामा कुल १७ जर्र्सी र होलष्टिन गाइहरुमा घरगोठमा पुगि सेवा प्रवाह भएको, ३७९ पशु पन्छीहरुको उपचार गरिएको र २५ ओटा पशुको स्थलगत रुपमा गोवर परीक्षण भएको भेटेरिनरी अस्पतालका प्रमुख नारायण कुसुमले बताएका छन् । वांझोपन संवन्धी समस्यालाई निराणकरण र न्यूनिकरण गर्न दिइएको समय तालिका अनुसार कार्यान्वयन गरिने समेत अस्पतालका प्रमुख कुसुमले प्रतिवद्दता जनाएका छन् ।
