आरसी टाइम्स व्युरो
पोखरा, चैत्र,१८
कृषि विकासका लागि सेवा टेवा गर्दै आइरहेको महानगरीय कृषि विकास शाखाले किसानकै बिचमा प्रश्नोत्तरी प्रतीयोगिता आयोजना गरेर एकिकृत कृषि ज्ञान प्रसारमा नौलो प्रयोग गरेको छ । पोखरा महानगरपालिकाको आर्थिक विकाश महाशाखाले ‘कृषि क्विज प्रतियोगिता’ नाम दिएर आयोजना गरिएको प्रतियोगितामा महानगरभित्रका ३१ वटा वडा कृषि सञ्जालका सदस्यहरुले उत्साहजनक सहभागिता जनाए । स्थानीय किसान र कृषि क्षेत्रमा रुचि राख्ने व्यक्तिहरूको ज्ञान परीक्षण र प्रोत्साहन गर्ने उद्देश्यले आयोजित सो प्रतियोगितामा वडा नम्बर ३० शिसुवाको कृषि सञ्जालले प्रथम स्थान हासिल गरेको छ । त्यस्तै, वडा नम्बर १३ आर्वाको वडा कृषि सञ्जाल दोस्रो र वडा नम्बर २९ भण्डारढिकको कृषि सञ्जाल तेस्रो स्थानमा आएका छन् ।
पोखरा सभागृहको प्रेक्षालयमा आयोजना गरिएको प्रतियोगितामा महानगरका ३३ वडा मध्ये सक्रिय रहेका ३१ वडाका कृषि सञ्जालका ३ जना प्रतिनिधीको समूहले भाग लिएका थिए । कृषि प्रविधिका तालिम र सहजिकरणका सवालहरुका साथै वाली, माटो, पशुपालन , कृषि विमा , रोग किरा व्यवस्थान, झार नियन्त्रण तथा वैकल्पिक खाद्यन्न र ऋषि कृषि अवधारणा एवं पोखराको कृषि इतिहासका सम्बन्धमा प्रश्नोत्तरीमा समेटिएको थियो । हरेक चरणमा ६ समुहको प्रतियोगिता गर्नका लागि गोला प्रणालीद्धारा एउटा समुहलाई अन्तिम चरणमा लैजाने ‘फिनाले’ घोषणा गरीएको मा वडा १७ ले भाग्यशाली मौका पाएको थियो ।
अन्तिम चरणमा समान अंक ल्याएका वडा १३ र वडा ३० बिचमा एक—एक प्रश्नको चूनौति चरण समेत संचालन गर्दा वडा नं १३ लाई उछिन्दै वडा नं ३०को कृषि सञ्जाल विजेता बेनेको थियो । प्रथम हुने वडा ३० को समूहमा अनन्त कण्डेल, बाबुराम ढकाल र शोभा न्यौपाने सहभागी थिए । द्वितीय हुने वडा १३ को टोलीमा रोशन बराल, विश्व सापकोटा र शान्ता श्रेष्ठ सहभागी थिए भने तृतीय स्थान हासिल गर्ने वडा २९ को समूहमा सागर पौडेल, लिला चापागाईं र विष्णु प्रसाद पौडेलले प्रतिनिधित्व गरेका थिए ।
विजयी समूहहरूलाई क्रमशः प्रथम, द्वितीय र तृतीय स्थानका लागि नगद पुरस्कार, प्रमाणपत्र र कृषि औजारहरू प्रदान गरिएको थियो । प्रथम समूहले २० हजार,द्वितीयले १५ हजार, तृतीयले १० हजार नगद पुरस्कार प्राप्त गरेका छन् ।
यो प्रतियोगिता कृषि क्षेत्रमा नवीन सोच र ज्ञानको प्रवद्र्धन गर्न आयोजना गरिएको आयोजक पोखरा महानगरपालिकाले दावी गरेको छ । प्रतियोगितामा सहभागी सबै समूहले जैविक खेती, माटो संरक्षण, बाली संरक्षण र आधुनिक कृषि प्रविधिजस्ता विषयमा प्रश्नहरूको सामना गर्दा किसानका सूचनाको दस्तावेजीकरण गर्नु पर्ने र नियमित प्रस्नोत्तरी अभ्यासले ज्ञान र अनुभवको दुरुस्तीमा टेवा पुग्ने बताए ।
कार्यक्रमलाइ सुभारम्भ गर्दै पोखरा महानगरपालिकाका मेयर धनराज आचार्यले कृषि क्षेत्रमा यस्ता कार्यक्रमले स्थानीय समुदायमा जागरुकता बढाउने र उत्पादन वृद्धिमा योगदान र्पुयाउने विश्वास व्यक्त गरे । उनले आगामी दिनमा यस्ता प्रतियोगिता र अन्य रचनात्मक कार्यक्रमलाई निरन्तरता दिइने पनि बताए । समारोमा गण्डकी प्रदेशका कृषि सचिव बासुदेव रेग्मीले यो प्रतियोगिताको सिकाइ अन्य पालिका र निकायहरुमा पनि विस्तार गर्न उपयुक्त हुने बताए ।
समूह चरणको अभ्यासको खेल सँगै सहभागीहरुका लागि पनि खुल्ला प्रश्नोत्तरको मौकामा फटाफट उत्तर मिलाउने सहभागीहरुका लागि जैविक मल र उपकरण पुरस्कारको व्यवसथा गरिएकाले सहभागीहरु अन्तीम चरण सम्मनै उत्सुकता पुर्वक भाग लिएका थिए ।
